Delhi Election Exit Poll 2025 : ਦਿੱਲੀ ਵਿੱਚ ਵਿਧਾਨ ਸਭਾ ਚੋਣਾਂ ਲਈ ਵੋਟਿੰਗ ਦਾ ਸਮਾਂ ਸਮਾਪਤ ਹੋ ਗਿਆ ਹੈ। ਸ਼ਾਮ 6 ਵਜੇ ਤੱਕ ਵੋਟਿੰਗ ਹੋਈ। ਦੱਸ ਦਈਏ ਕਿ 70 ਸੀਟਾਂ ਲਈ 699 ਉਮੀਦਵਾਰ ਚੋਣ ਮੈਦਾਨ ਵਿੱਚ ਹਨ। ਵੋਟਿੰਗ ਦੇ ਨਾਲ, ਉਮੀਦਵਾਰਾਂ ਦੀ ਕਿਸਮਤ ਈਵੀਐਮ ਵਿੱਚ ਕੈਦ ਹੋ ਗਈ ਹੈ। ਹੁਣ ਅਸੀਂ 8 ਫਰਵਰੀ ਦੀ ਉਡੀਕ ਕਰ ਰਹੇ ਹਾਂ। ਚੋਣ ਨਤੀਜੇ ਇਸ ਦਿਨ ਐਲਾਨੇ ਜਾਣਗੇ। ਪਰ ਇਸ ਤੋਂ ਪਹਿਲਾਂ, ਐਗਜ਼ਿਟ ਪੋਲ ਦੇ ਨਤੀਜੇ ਆਉਣ ਲੱਗ ਪਏ ਹਨ।
ਕੀ ਕਹਿੰਦੇ ਹਨ ਐਗਜ਼ਿਟ ਪੋਲ
ਵੋਟਿੰਗ ਦੇ ਸਮਾਪਤੀ ਦੇ ਮਗਰੋਂ ਹੁਣ ਐਗਜ਼ਿਟ ਪੋਲ ਵੀ ਸਾਹਮਣੇ ਆਉਣ ਲੱਗੇ ਹਨ। ਇਨ੍ਹਾਂ ਐਗਜਿਟ ਪੋਲਾਂ ’ਚ ਬੀਜੇਪੀ ਸਰਕਾਰ ਬਣਨ ਦੀ ਉਮੀਦ ਜਤਾਈ ਜਾ ਰਹੀ ਹੈ। Matrize ਤੇ JVC ਮੁਤਾਬਿਕ ਦਿੱਲੀ ’ਚ ਬੀਜੇਪੀ ਦੀ ਸਰਕਾਰ ਬਣ ਸਕਦੀ ਹੈ। P-MARQ ਮੁਤਾਬਿਕ ਬੀਜੇਪੀ ਨੂੰ 39-49 ਸੀਟਾਂ ਮਿਲਣ ਦੀ ਉਮੀਦ ਹੈ। ਜਦਕਿ ਆਮ ਆਦਮੀ ਪਾਰਟੀ ਨੂੰ 21 ਤੋਂ 31 ਸੀਟਾਂ ਮਿਲਣ ਦੀ ਉਮੀਦ ਹੈ। ਚਾਣਕਿਆ ਮੁਤਾਬਿਕ ਬੀਜੇਪੀ ਨੂੰ 39-44 ਸੀਟਾਂ ਦੀ ਉਮੀਦ ਹੈ। ਇਸ ਤੋਂ ਇਲਾਵਾ ਆਮ ਆਦਮੀ ਪਾਰਟੀ ਨੂੰ 25 ਤੋਂ 28, ਕਾਂਗਰਸ ਨੂੰ 2 ਤੋਂ ਤਿੰਨ ਸੀਟਾਂ ਮਿਲਣ ਦੀ ਉਮੀਦ ਹੈ। ਪੀਪਲਸ ਪਲਸ ਬੀਜੇਪੀ ਨੂੰ 51-60 ਅਤੇ ਆਮ ਆਦਮੀ ਪਾਰਟੀ ਨੂੰ 10-19 ਸੀਟਾਂ ਦੀ ਉਮੀਦ ਹੈ।
ਦੂਜੇ ਪਾਸੇ ਐਗਜ਼ਿਟ ਪੋਲ ‘ਤੇ, ਦਿੱਲੀ ਭਾਜਪਾ ਪ੍ਰਧਾਨ ਵੀਰੇਂਦਰ ਸਚਦੇਵਾ ਕਿਹਾ ਕਿ ਮੈਂ ਦਿੱਲੀ ਦੇ ਲੋਕਾਂ ਨੂੰ ਵਧਾਈ ਦੇਣਾ ਚਾਹੁੰਦਾ ਹਾਂ, ਦਿੱਲੀ ਦੇ ਲੋਕਾਂ ਨੇ ਅੱਜ ਭਾਜਪਾ ਨੂੰ ਬਹੁਤ ਪਿਆਰ ਅਤੇ ਆਸ਼ੀਰਵਾਦ ਦਿੱਤਾ ਹੈ… ਦਿੱਲੀ ਵਿੱਚ। ਆਪ ਜਾ ਰਹੀ ਹੈ ਅਤੇ ਭਾਜਪਾ ਆ ਰਹੀ ਹੈ… ਜੇਕਰ ਕੋਈ ਜਾਅਲੀ ਵੋਟਿੰਗ ਕਰਦਾ ਹੈ, ਤਾਂ ਉਹ ਫੜਿਆ ਜਾਵੇਗਾ… ਅਸੀਂ ਪਹਿਲੇ ਦਿਨ ਤੋਂ ਹੀ ਇਸ ਬਾਰੇ ਕਹਿ ਰਹੇ ਹਾਂ, ਅਤੇ ਇਹ ਚੰਗਾ ਹੈ ਕਿ ਉਹ ਫੜਿਆ ਗਿਆ ਹੈ… ਦਿੱਲੀ ਦੇ ਲੋਕ ਭ੍ਰਿਸ਼ਟਾਚਾਰ ਮੁਕਤ ਸਰਕਾਰ ਚਾਹੁੰਦੇ ਹਨ ਅਤੇ ਉਹ ਵਿਕਾਸ ਚਾਹੁੰਦੇ ਹਨ…”
ਦਿੱਲੀ ’ਚ ਤਿਕੌਣਾ ਮੁਕਾਬਲਾ
ਇਹ ਚੋਣ ਆਮ ਆਦਮੀ ਪਾਰਟੀ ਲਈ ਬਹੁਤ ਮਹੱਤਵ ਰੱਖਦੀ ਹੈ। ਜਦਕਿ ਭਾਜਪਾ ਅਤੇ ਕਾਂਗਰਸ ਵੀ ਚੋਣ ਮੈਦਾਨ ਵਿੱਚ ਹਨ ਅਤੇ ਵਾਪਸੀ ਲਈ ਸਖ਼ਤ ਕੋਸ਼ਿਸ਼ ਕਰ ਰਹੀਆਂ ਹਨ। 1993 ਵਿੱਚ ਭਾਜਪਾ ਨੇ ਦਿੱਲੀ ਵਿੱਚ ਜਿੱਤ ਪ੍ਰਾਪਤ ਕੀਤੀ ਸੀ, ਪਰ ਉਸ ਤੋਂ ਬਾਅਦ ਇਸਨੂੰ ਕਦੇ ਜਿੱਤ ਨਹੀਂ ਮਿਲੀ। ਇਸ ਦੇ ਨਾਲ ਹੀ ਕਾਂਗਰਸ 1998, 2003, 2008 ਵਿੱਚ ਲਗਾਤਾਰ ਜਿੱਤਦੀ ਰਹੀ ਅਤੇ ਸ਼ੀਲਾ ਦੀਕਸ਼ਿਤ ਮੁੱਖ ਮੰਤਰੀ ਬਣੀ ਰਹੀ। ਇਸ ਵਾਰ ਚੋਣਾਂ ਵਿੱਚ ‘ਆਪ’ ਨੂੰ ਭਾਜਪਾ ਅਤੇ ਕਾਂਗਰਸ ਤੋਂ ਸਖ਼ਤ ਮੁਕਾਬਲਾ ਮਿਲ ਰਿਹਾ ਹੈ।
ਦੋਵਾਂ ਚੋਣਾਂ ਦੇ ਨਤੀਜੇ ਕਿਵੇਂ ਰਹੇ?
2020 ਦੀਆਂ ਚੋਣਾਂ ਵਿੱਚ, ‘ਆਪ’ ਨੇ 62 ਸੀਟਾਂ ਜਿੱਤੀਆਂ ਅਤੇ 53.80 ਫੀਸਦ ਵੋਟਾਂ ਪ੍ਰਾਪਤ ਕੀਤੀਆਂ। ਜਦਕਿ ਭਾਜਪਾ ਨੇ 8 ਸੀਟਾਂ ਜਿੱਤੀਆਂ ਅਤੇ 38.70% ਵੋਟ ਸ਼ੇਅਰ ਪ੍ਰਾਪਤ ਕੀਤਾ। 2015 ਦੀਆਂ ਚੋਣਾਂ ਵਿੱਚ, ‘ਆਪ’ ਨੇ 67 ਸੀਟਾਂ ਜਿੱਤੀਆਂ ਅਤੇ 54.50 ਫੀਸਦ ਵੋਟਾਂ ਪ੍ਰਾਪਤ ਕੀਤੀਆਂ। ਭਾਜਪਾ ਨੇ ਤਿੰਨ ਸੀਟਾਂ ਜਿੱਤੀਆਂ ਸਨ ਅਤੇ 32.30 ਫੀਸਦ ਵੋਟਾਂ ਪ੍ਰਾਪਤ ਕੀਤੀਆਂ ਸਨ।
ਦਿੱਲੀ ਦੀਆਂ ਕਿਹੜੀਆਂ ਸੀਟਾਂ ‘ਤੇ ਸਾਰਿਆਂ ਦੀਆਂ ਨਜ਼ਰਾਂ ਹਨ ?
ਦਿੱਲੀ ਚੋਣਾਂ ਵਿੱਚ ਬਹੁਤ ਸਾਰੀਆਂ ਸੀਟਾਂ ਹਨ, ਜਿਨ੍ਹਾਂ ਦੇ ਨਤੀਜਿਆਂ ‘ਤੇ ਹਰ ਕਿਸੇ ਦੀਆਂ ਨਜ਼ਰਾਂ ਹਨ। ਅਰਵਿੰਦ ਕੇਜਰੀਵਾਲ, ਆਤਿਸ਼ੀ, ਪਰਵੇਸ਼ ਵਰਮਾ, ਰਮੇਸ਼ ਬਿਧੂਰੀ ਅਤੇ ਕੈਲਾਸ਼ ਗਹਿਲੋਤ ਵਰਗੇ ਪ੍ਰਮੁੱਖ ਨੇਤਾ ਦੌੜ ਵਿੱਚ ਹਨ। ਨਵੀਂ ਦਿੱਲੀ ਸੀਟ ਸਭ ਤੋਂ ਹਾਈ-ਪ੍ਰੋਫਾਈਲ ਹੈ। ਇੱਥੇ ਮੁਕਾਬਲਾ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ, ਭਾਜਪਾ ਦੇ ਪ੍ਰਵੇਸ਼ ਵਰਮਾ ਅਤੇ ਸੀਨੀਅਰ ਕਾਂਗਰਸੀ ਨੇਤਾ ਸ਼ੀਲਾ ਦੀਕਸ਼ਿਤ ਦੇ ਪੁੱਤਰ ਸੰਦੀਪ ਦੀਕਸ਼ਿਤ ਵਿਚਕਾਰ ਹੈ।
ਪਟਪੜਗੰਜ ਸੀਟ ‘ਤੇ ‘ਆਪ’ ਤੋਂ ਅਵਧ ਓਝਾ, ਭਾਜਪਾ ਤੋਂ ਰਵਿੰਦਰ ਸਿੰਘ ਨੇਗੀ ਅਤੇ ਕਾਂਗਰਸ ਤੋਂ ਅਨਿਲ ਚੌਧਰੀ ਵਿਚਕਾਰ ਮੁਕਾਬਲਾ ਹੈ। ਉੱਤਰ-ਪੱਛਮੀ ਖੇਤਰ ਦੀ ਰੋਹਿਣੀ ਸੀਟ ‘ਤੇ ‘ਆਪ’ ਦੇ ਪ੍ਰਦੀਪ ਅਤੇ ਭਾਜਪਾ ਦੇ ਵਿਜੇਂਦਰ ਗੁਪਤਾ ਵਿਚਕਾਰ ਮੁਕਾਬਲਾ ਹੈ।
ਕਾਲਕਾਜੀ ਸੀਟ ‘ਤੇ ਦਿੱਲੀ ਦੀ ਮੌਜੂਦਾ ਮੁੱਖ ਮੰਤਰੀ ਆਤਿਸ਼ੀ, ਸਾਬਕਾ ਭਾਜਪਾ ਸੰਸਦ ਮੈਂਬਰ ਰਮੇਸ਼ ਬਿਧੂਰੀ ਅਤੇ ਕਾਂਗਰਸ ਦੀ ਅਲਕਾ ਲਾਂਬਾ ਵਿਚਕਾਰ ਤਿਕੋਣਾ ਮੁਕਾਬਲਾ ਹੈ। ਜੰਗਪੁਰਾ ਸੀਟ ਤੋਂ ਆਪ ਤੋਂ ਮਨੀਸ਼ ਸਿਸੋਦੀਆ, ਭਾਜਪਾ ਤੋਂ ਸਰਦਾਰ ਤਰਵਿੰਦਰ ਸਿੰਘ ਮਾਰਵਾਹ ਅਤੇ ਕਾਂਗਰਸ ਤੋਂ ਫਰਹਾਦ ਸੂਰੀ ਚੋਣ ਮੈਦਾਨ ਵਿੱਚ ਹਨ।
